أسئلة شائعة

أسئلة شائعة لأولياء الامور في السنوات السابقة

♦♦♦   اعمل ايه قبل كتابة الاستمارة ؟

احسب الاول سن طفلك في أول اكتوبر 2020 ، وشوف المدرسة المناسبة له من حيت السن ومن حيث موقع المدرسة


♦♦♦   هو انا ممكن اسجل من على الموبيل ؟

طبعا التسجيل يمكن من على الموبيل او الكمبيوتر


♦♦♦   بسجل لأبني والسن في أول اكتوبر مش بيظهر ، ومبيكملش التسجيل ؟

دا خطأ في استخدام المتصفح ، ويرجى استخدام جوجل كروم  على الكمبيوتر او الموبيل.


♦♦♦   هو لازم نطبع الاستمارة ؟

نعم ودا ضروري جدا ، ولابد من تقديمها للمدرسة ودا يعتبر شرط من شروط دخول الطفل للتنسيق.


♦♦♦   انا سجلت ولم اقم بالطباعة ، ايه المشكلة؟

خطأ ولابد ان حضرتك تطبع الاستمارة أثناء فترة التسجيل ، لأن دا لن يكون متاح بعد غلق الموقع ، ولابد من تقديم الاستمارة للمدرسة ، وإذا لم يتم طباعة الاستمارة أو طبعت ولم يتم تسليمها لمدرسة الرغبة الأولى ، يستبعد الطفل نهائيا من التنسيق.


♦♦♦   هو انا اعمل المقابلة في اي مدرسة من الرغبات الثلاثة ؟  (هـــــام ) 

 استثناءا هذا العام وحفاظا على صحة الأطفال ، سيتم تأجيل المقابلة لحين اعلان التنسيق ، وتتم المقابلة في المدرسة التي تم قبول الطفل فيها.


♦♦♦   هو ممكن اروح المدرسة من غير الطفل ؟

لأ – لابد من حضور الطفل المقابلة في المدرسة ، لانها شرط من شروط دخول المدرسة.


♦♦♦   اخر معاد للتسجيل على الموقع ايه ؟

معلن على الموقع ان اخر موعد يوم 30/ 6 / 2020  والموقع يغلق بعد التاريخ دا.


♦♦♦   انا غلطت في الرغبات بعد الحفظ ، اعمل ايه ؟

حضرتك روح لمدرسة الرغبة الأولى ، وفيه استمارة تعديل بيانات ، بصورة بطاقة ولي الأمر ، المدرسة لها صلاحية تغيير الرغبتين الثانية ، والثالثة فقط .


♦♦♦   هو انا ممكن اغير الرغبة الأولى ؟

للأسف لأ  .


♦♦♦  انا في الخارج ، ومش هعرف اعمل مقابلة للطفل ؟

سجل على الموقع ، واي حد داخل مصر من الأقارب يطبع الاستمارة ، المقابلة لما الطفل يقبل بالمدرسة لابد من وجوده داخل البلاد لإجراء المقابلة.


♦♦♦  اخد معايا ايه وانا رايح اعمل المقابلة ؟

اهم حاجة الطفل ، وشهادة ميلاد حديثة للطفل ، و6 صور حديثة للطفل – وقرار ولاية تعليمية في حالة اختلاف ولي الأمر او انفصال الوالدين.


♦♦♦  ايه لزمة المقابلة دي ؟

القرار الوزاري الخاص بالتنسيق اشترط مقابلة للطفل ، للتأكد من سلامته الذهنية .


♦♦♦  النتيجة بتعلن امته ؟

بعد غلق التنسيق بيتم الاعلان عن النتيجة النهائية للتنسيق.


♦♦♦ والتنسيق دا بيتم على اساس ايه ؟

الأساس هو السن والرغبة .


♦♦♦  هو ممكن اغير الرغبات بعد التنسيق ؟

نهائيا  لا ، لا  ، لا  ، علشان كدا يجب التركيز في كتابة الرغبات


 

40 تعليق

  1. عوزه اعرف السن لتقديم بنتى هاتم ٤ سنين فى ٩

    • سن بنت حضرتك مسموح للتقديم
      سن التقديم في المدارس الرسمية من اربع سنوات الى ما دون الستة سنوات

  2. لو سمحت مفيش تقديم لكي جي ٢ لو حد فاته انه يقدم السنه الي فاتت

  3. سحر فؤاد المهدي

    سن التقديم كام سنة

    • سن التقديم في المدارس الرسمية من اربع سنوات الى ما دون الستة سنوات ، يعني لو ست سنوات بالظبط في اول اكتوبر لا يقبل برياض الاطفال لأن دا سن الابتدائي الإلزامي

  4. في حالة كتابة الطفل من مواليد محافظة أخري وانا أقيم في محافظة الدقهلية بشكل دائم هل يؤثر ذا لك علي التنسيق

  5. شريف فكري على مطاوع

    السلام عليكم. انا كنت مسافر وملحقتش اقدم لابني العام الدراسي السابق رغم ان سنه في أكتوبر٢٠١٩ خمس سنوات وستة أشهر. فقمت بتقديم أوراقه في مدرسه لغات.
    هل يجوز تقديم أوراقه ثانية على مرحلة KG2لان سنه في أكتوبر ٢٠٢٠ هيبقى ستة سنوات وستة اشهر

    • سن التقديم في المدارس الرسمية من اربع سنوات الى ما دون الستة سنوات ، يعني لو ست سنوات بالظبط في اول اكتوبر لا يقبل برياض الاطفال لأن دا سن الابتدائي الإلزامي

  6. احمد نبيل محمد رشاد

    سن طفلي يبلغ في اول اكتوبر اقل من متوسط سن التنسيق لاقرب مدرسه في النطاق الجفرافي للسكن
    الرجاء الافاده بموقفه اذا لم ينطبق عليه شروط التنسيق للسن مع العلم انني لا استطيع التقديم للطفل في مدرسه بعيده عن سكنه ولكم جزيل الشكر

    • حضرتك عندك ثلاثة رغبات للاختيار … معيار التنسيق الوحيد هو السن والاختيار لكل مدرسة من الأكبر سنا من المتقدمين لها

  7. لو سمحتوا انا معايا توكيل عام من جوزي ينفع في التقديم ولا لازم ولايه تعليميه وكمان بنتي سنها اول عشره خمس سنين وأقرب مدرسه ليا كفر الباز الرسمية وتنسيقها كان اعلي من خمس ينفع اكتبها رغبه اولي ولا لازم مدرسه تنسيقها اقل

    • التوكيل العام ينفع … وحضرتك اكتبي المدرسة القريبة لكي أول رغبة واختاري رغبتين تانيين وبالتوفيق إن شاء الله

  8. أماني منتصر كامل

    اعرف ازاي ان ابني اتقبل في المدرسة

    • بعد اغلاق موعد التنسيق يتم عمل التنسيق والاعلان عن نتيجة التنسيق في نفس الموقع .

  9. اذا تم قبولى ف الرغبه الثالثة واما اريد الاولى … ممكن مكملش ملفى وانتظر ولا لازم اكمل وادفع المصاريف ثم انتظر

    • لايمكن ، الانتظار الى بعد دفع المصاريف ، ومن لن يسدد المصاريف سيفقد الحق في الالتحاف وسيتم استبداله بالطفل الذي يليه في التنسيق ، وحضرتك دا مكتوب في الارشادادت
      مع ملاحظة ، اذا تم النزول بالسن في المدرسة الاولى او الثانية ، وحضرتك ترغبي في النقل بين المدرستين فهذا متاح بالطبع .

  10. الموقع ده للمدارس الرسميه للغات فقط ولا ممكن الحكوميه ايضا
    لو حابه اضيف في الرغبات مدارس الحكوميه هنا اضيف ولا في موقع تاني

  11. اشرف عبدالرازق ياسين

    ف جائحة كرونا ووضع ايقاف الطيران من والى مصر فهل يمكن تأجيل المقابلة الشخصية للطفل لحين العودة الى مصر ؟؟

  12. هل من الضرورى ان تكون شهادة ميلاد الطفل حديثة
    السجل المدنى مغلق ومعايا كذا شهادة للبنت من حوالى 4 سنين .. كده فيه مشكلة

  13. لو الزوج من محافظة تانية خالص واحنا عايشين في المنصورة ووالده اصلا مسافر أقدم ببطاقتي عادي ولا لازم بطاقة الزوج وتغيير الاقامة

  14. بنتي في مدرسة الفردوس الرسمية للغات وهقدم لابني السنة دي فيها ان شاء الله وهي اقرب مدرسة من حيث السكن وهاكتبها رغبة اولى. هل وجود اخته في المدرسة يدي صلاحية ليه انه يتقبل في نفس مدرستها؟؟؟

  15. احنا خارج مصر. … بحتاج اعرف ميعاد تقريبى لظهور نتيجه التنسيق للعودة إلى مصر لإجراء المقابله الشخصية؟ ؟؟؟؟؟
    لانى حسب مافهمت أن المقابله فى موعد أقصى 10 أيام من ظهور نتيجه التنسيق
    ما هو توقيت ظهور نتيجة التنسيق؟؟؟؟؟؟؟

  16. انا ابني هيكون عنده خمس سنين وشهرين على أول أكتوبر … ايه الوضع لو لم يتم القبول في الرغبات الثلاثه؟؟

    • مسموح حتى ست سنوات إلا يوم في 1/10/2020 فقط ولو تم ست سنوات في هذا التاريخ أو تجاوزها لا يمكنه التقدم

  17. لوسمحت انا بنتي عمرهافي اول أكتوبر ٦سنين ينفع أقدم

  18. منى بهاء الدين

    السلام عليكم..
    محل الإقامة في بطاقة الرقم القومي لزوجي محافظة أخرى غير المحافظة اللي مقيمين فيها حاليا.. هيكون ف مشكلة في التقديم لإبني بمحافظة الإقامة ..

  19. بنتى خارج مصر والسن فى اول اكتوبر هيبقى خمس سنوات و١٠شهور و٢٠ يوم وهى فىkj2 حاليا في ايطاليا .ممكن اقدملها على اولى ابتدائي أو kj2 فى مصر ولو ينفع اجيب جواب من هنا يثبت أنها فى الحضانه ولا لا

    • حضرتك لما بترجع مصر بتاخد جواز السفر وشهادتها الموثقة من الدولة اللي حضرتك كنت فيها وبتتوجه لإدارة شئون الطلبة لمراجعة الأوراق وبعدبن بتتوجه لنا في إدارة المدارس الرسمية للغات بالمديرية وبناء على الأوراق اللي هنشوفها وسن البنت بنشوف وضعها إيه

  20. عبد الرازق المرسي

    ممكن تفسير لهذا الشرط رقم
    16.ولي الأمر ملتزم بقضاء نجله عامين بمرحلة رياض الأطفال Kg1 / Kg2 وذلك من بداية العام الدراسي 2021/2020 وليس له الحق في المطالبة بدخول نجليه الصف الأول الابتدائي إلا بعد مضي عامين.
    هل هذا معناه الطفل يدخل الصف الاول الابتدائي بعد مضي سنتين بعد الحضانه ولا يدخل بعد ميخلص حضانه علي طول
    انا بنتي مقدمه وعندها اربع سنين و ٢5 يوم لما تخلص حضانه هتبقي ست سنين و ٢5 يوم كده هتدخل ابتدائي وهيه عندها ست سنين ولا تمن سنين

    • دا معناه أن حتى لو سن الطفل وصل لست سنين وشوية في kg2 مش من حق ولي الامر المطالبة انه يدخل الصف الاول الابتدائي ، يعني لابد قضاء عامين في رياض الاطفال
      وطالما يعني لو تم قبولها في kg1 هتكمل سنتين في رياض الأطفال وتنتقل الى الصف الاول الابتدائي تلقائيا بعد انقضاء العامين

اترك رداً على منى بهاء الدين إلغاء الرد

لن يتم نشر عنوان بريدك الإلكتروني. الحقول الإلزامية مشار إليها بـ *